冇錯，香港的確係變咗。睇住自己嘅土地逐漸北方化，心中除咗慨嘆，亦都係慨嘆！
以下文章轉載自：http://hi.baidu.com/lwfxbox/blog/item/68754151a3397c858d5430e6.html ，感謝。
相信小時候每個人心中都會有一個夢想天堂，嗰度至高無上，嗰度充滿幻想同希望，嗰度可以逃離壓迫，嗰度係理想者居住嘅樂園，嗰度係每個人嚮往嘅夢想天堂，不過暫時又可望而不可及。雖然當時我哋普遍生活水平比較艱苦，但係大家對生活都會充滿幻想嘅動力，使日子不斷精彩，不斷追尋心中理想嘅天堂…
但係如果有一日，咿個夢想中嘅天堂慘遭破滅！黯然失色，畀任何人隨意譴踏、地位降級甚至逐步淪落…好比如同自己由細到大嘅嘅夢想情人畀多個以上嘅蠱惑仔性侵犯過又拒絕哎救命咁，見到此情此景你又可以點做呢？此時此刻無言以對…
-
集體回憶：味道
如果話：我屋企嘅氣味好聞過你屋企，你哋未必會認同，憑乜嘢咁講啊？冇錯，因為同一個天空有乜理由會有分別呢？但係如果時光翻到咗廿幾年前嘅某一日，當時我香港啲親戚啱啱翻咗嚟，嗰啲冇海外關係嘅同學仔又啱啱嚟到我屋企玩。佢哋實會話：你屋企好好聞啊．．．我鍾意聞咿陣味。其實當時我屋企冇噴香水，更加冇空氣清新劑之類嘅物件。就係因為我親戚帶上嚟嗰啲進口物件散發出嚟嘅味道，因為佢哋附帶咗資本主義香港嘅氣味，一種脫俗嘅香味．．．
唔知點解我當時特別鍾意聞喺海外帶翻嚟嘅物件氣味，就連親戚上到大陸身上都會流露一股難以形容嘅特殊香味，真係一聞難忘，所以每次有親戚翻嚟嗰陣我都鍾意圍住佢索翻兩啖嘆下。而當佢拉開行李袋拉鏈時，嗰種氣味就更加好聞。例如：衫、褲、鞋、襪等等．．．仲記得嘉信士香皂、力士香皂、棕欖沐浴露、紅A雞汁伊麺、出前一丁、公仔麺、嘉頓生命麵包、維他奶、碧泉檸檬茶、味丹牌味精、益力多、虎頭標萬金油、雙飛人藥水、夏士蓮潤膚露，總然之一聞就知係由香港帶過嚟嘅！（雖然現時超市都有得賣，不過都係中山、珠海、東莞等地出品嘅合法老翻，並非原裝）
我曾經唔止一次幻想幾時可以喺嗰度生活就好囉，因為嗰度呼吸空氣都新鮮。。。
-
香港某種程度上可以話係廣州人嘅後花園。我哋自小聽香港嘅電臺、睇香港電視長大、獲得最新潮流資訊、用香港帶上嚟嘅物件，甚至連睇天氣預告都係以香港臺報導爲準。回憶睇港產片時代：英雄本色系列、最佳拍檔系列、天若有情系列、逃學威龍系列等，回憶歡樂今宵、勁歌金曲、笑星救地球、各類頒獎典禮．．．課間同學談論香港潮流資訊，學寫正體字，唱港台流行曲，炫耀個人物件。當時擁有一張港紙，不論面值幾大都係焦點，同學之間相互傳閱、臨摹上面嘅圖案、對比紙幣里嘅頭像．．．仲有攞住張親戚用過嘅直通車票亦都算走在潮流尖端，因為可以話畀同學知道你有香港親戚，攪到咿張過氣嘅車票就好似一張身份證。而探親假期翻嚟嘅同學就展示佢張瓷碟相、維港背景啵．．．仲有餐具、筆、海報等紀念品、就連擁有一支３Ｍ涂改液也自豪。所以當時比起其他大陸省份亦覺得滿足，因為我哋係最接近香港嘅潮流人士。
記得80年代初期，香港被大陸稱作“文化沙漠”“資產階級知識嘅毒瘤”“反動思想發源地”咁又如何？魅力依然不減！咪一樣有大把志同道合嘅追隨者擁護住咿個地方、一班又一班窮途末路人士偷渡到咿個天堂。（我曾經都有咿個念頭）我記得當時有好多另類文化係喺咿個地方上學到嘅，起碼畀我哋知道好多事件真相。
本來我對時事政治唔感興趣，更加唔會有情感流露。但係有一件事件令我好傷感，甚至好痛心… 事件回放到八十年代末。喺電視上睇到戴卓爾夫人摔倒臺階嘅鏡頭，中英聯合聲明嘅出現,趙總理簽署諒解備忘錄直到1997.7.1……
香港回歸嗰日我心情唔識點形容，剛好同鋪天蓋地嘅慶祝標題截然相反！無奈中覺得雖然夢想天堂距離拉近了但從此變得更陌生！甚至害怕夢想破滅！
-
赤化進行曲前傳
回歸前有幸路過香港，遊逛市區一帶覺得非常舒服,雖然喺陌生城市但有熟悉親切嘅歸屬感覺。到處有同聲同氣嘅市民，繁忙嘅都市，首秩序嘅途人，有軌嘅叮叮電車，茂密嘅石屎森林，急速嘅城市節奏．．．我對一條馬路同一個碼頭非常感興趣“皇后大道”當時睇住個路牌諗咗好多嘢，羅大佑、蔣志光究竟係褒定貶呢？回歸後會唔會改名呢？如果改，咁係咪叫“人民路”啊？越諗越好笑，係笑緊自己嘅諗法。大陸嘅民眾只會知道每個城市都會有條路叫“人民路” 至於碼頭唔駛講都知係乜嘢啦，冇錯“皇后碼頭”同樣嘅命運會係點呢？拆咗？改名？
之後坐住叮叮穿梭於鬧市間，眼球似乎停不了，好似名車展嘅馬路、雕塑像映照下嘅請願團體、區議員拉票嘅宣傳車．．．記得當時喺灣仔仲望到一面五星紅旗添，估計當時全香港只有灣仔有咿面旗。
-
赤化進行曲進行時
幾年前國外有報導話：【中國人去到邊，咿個世界就亂到邊】。攪撚錯啊！邊閪個咁話我哋中國人啊？中國人咁團結，同你死過都得啊！因為當時我哋都好熱血．．．
香港同回歸前已經完全唔一樣。九七前我喺香港過馬路有壓力，企喺斑馬線前面對行人信號紅燈而又睇見冇車嘅馬路時，蠢蠢欲動想沖過去，但係見其他行人卻乖乖咁企喺度等燈，我內心正打仗（過！唔過！過！唔過！過！唔過…）。反觀現在喺ＭＫ過馬路同樣有壓力，同樣冇車嘅馬路同樣嘅信號紅燈，我乖乖咁企喺斑馬線前等燈，但係身邊嘅行人卻匆匆咁走過馬路，完全無視企喺度等燈嘅我，我內心同樣喺度打緊仗（跟！唔跟！跟！唔跟！跟！唔跟…）
-
特別自由行開始，為咗討好大陸，一切甘愿回歸大陸化，連日常用品好多仲係大陸供貨添。喺ＭＫ一帶已覺得空氣非常渾濁，MK街頭大陸佬多過港人。香港嘅特色文化開始消減，其中語言文字首當其中，咿家嘅香港就好似大陸城市咁，太多大陸佬啦！，幾乎普通話多過廣州話！。甚至連正體字都就快要滅亡啦！喺香港簡體字招牌已經唔係新鮮事物。回想當年我第一次落香港，過關嗰陣，周圍嘅宣傳單張同招牌廣告都係用正體字，但係咿家有八成以上都已經變成簡體字！要睇簡體字不如翻上大陸睇，駛乜落香港睇啊？
-
以前睇港產片，真係好地道，港產明星、港產主題曲越睇越有ＦＥＥＬ。近幾年嘅港產片點都好似差緊啲嘢又多咗啲唔知乜嘢咁，係乜呢？就係每齣港產片都要加入國語元素，或者大陸演員才算係港產片。要擦鞋都唔駛咁做啵？畀人摑完左邊臉仲要畀埋右邊人摑！睇嚟大陸正在演變成佢哋嘅天堂.．．
-
先前睇見香港報道投訴大陸人自由行嘅惡行醜態，我覺得香港現時冇資格投訴，且係香港自己攞嚟衰嘅，點解？食得鹹魚抵得渴，明知大陸惡人多仲要畀佢哋咁多人嚟！家陣嘅香港好比如一個矜貴時尚嘅女性變成一個鍾意性濫交嘅淫娃蕩婦！咩人都啱，來者不拒！開放一個省份都未夠，仲要開放哂所有省份先安樂．．．邊有資格投訴我哋大陸人！一字咁淺：“寧缺勿濫！一個紅牌阿姑，并不是咩客人都接，所以佢可以保持高價位。只有嗰啲自甘墮落嘅咈得妹先會咁開放！咩人都受，甚至唔收錢都肯，到頭嚟就係：犯賤！
-
難道我哋心中嘅天堂會變成咁？曾經係我哋後花園嘅地方從此消失？曾高不可攀如今變為腳底地方。天堂啊！你究竟有冇理過一大班忠實擁躉嘅感受？心裡頓感難過，害怕．．．同時極力掩飾，怕遭別人取笑。“你唔再係我哋嘅天堂！我哋唔再需要咁嘅天堂！終於擁躉們開始鄙視你！討厭你”
縱觀天堂嘅演變覺得無奈兼惋惜。如果上天畀多次願望我哋，寧願上世紀里永遠消失四個數字：“1997”（因為嗰年年頭我老竇亦永遠咁離開咗我）寧願我永遠去唔到咿個地方亦唔想佢畀人糟蹋，一個曾經夢想中嘅天堂。。。
因為始終有咿個天堂存在！作為大家永存生活嚮往嘅夢想！
轉載完畢。
我哋係咪真係要坐以待斃？喐手喇！
Canary Build 有專屬嘅新Icon ，界面冇變到……哇，金色特別版喎！係咪特別型呢？
